الله يخلى الحكومة ما قصرت في شى

امس طلع علينا المستشار/ جودة الملط رئيس الجهاز المركزي للمحاسبات في مجلس الشعب بتقرير اهم ما فيه
أن الدين العام للحكومة وصل 449 مليار جنيه وهويفوق الدخل القومي.
أن الدين الداخلي يفوق الدخل القومي بأربعة اضعاف وقد وصل هذا الدين إلي 440 مليار.
السواد الأعظم من الشعب المصري لم يشعر بفوائد الانجازات الاقتصادية التي تحققت.
هناك ازمة ثقة بين الشعب والحكومة وخصوصا فيما يتعلق بالارقام.
تقهقر أداء الحكومة وفشلها في مجالات التعليم والصحة والاسكان والنقل والصرف الصحي ومياه الشرب.
... أنا مش عارف المستشار الحاقد ده ماله ومال حكومتنا الرشيده ..هو مش عارف ان عندنا مثلا اربعه جائزة نوبل في جامعه مثل جامعة القاهرة رغم ان ترتيبها ال500 علي العالم بعد جامعات الموزمبيق وجزر القمر وابوتشت ..ومش عارف كمان ان المواطن بيدخل المستشفي ايد وره وايد قدام يطلع بفوطه في ايده وفوطه في بطنه...ومش حاسس بالمجهودات العظيمة للدوله في مجال الاسكان وخصوصا بعدما وقعت عمارة الاسكندرية وترحيل الناس للشوارع اللي عماراتهم آيله للسقوط وبرضه الناس مش راضيه تسيب العمارات عشان متعملش ازمه في الشوارع لما تبات فيها وتعكنن علي الحكومة...برضه مش مدرك ازاي الحكومه بتبذل مجهود في تحديد النسل عن طريق ترحيل العشرات يوميا الي المقابر عبر وسائل النقل المختلفه ونزيف الأسفلت المستمر....وماله لما نشرب ميه مختلطة بمياه الصرف مهي مية الصرف نازله مننا .
انا باقول للمستشار /جودة الملط نصيحه يحطها حلقه في ودنه ( يا داخل بين البصله وقشرتها ما ينوبك غير صنانتها) الكلام اللي انت بتقوله ده تروح تقوله في بريطانيا او امريكا او حتي مورتنيا لكن احنا ما بيخيلش علينا الكلام ده دحنا والحكومة سمن علي عسل .